ವಿಂಡೋಸ್ ೧೦ ರಿಲೀಸ್ ಆಗಿ ಸುಮಾರು ೬ ವರ್ಷದ ನಂತರ ವಿಂಡೋಸ್ ೧೧ ರಿಲೀಸ್ ಆಯ್ತು. ಈ ಹೊಸ ವಿಂಡೋಸ್ ೧೧ ಅಲ್ಲಿ ಏನು ಹೊಸತಿದೆ? ಬನ್ನಿ ತಿಳಿಯೋಣ.
{tocify} $title={ವಿಷಯ ಸೂಚಿ}
ವಿಂಡೋಸ್ ೧೧ರಲ್ಲಿ ಹೊಸತು ಏನಿದೆ?
ರೌಂಡಡ್ ಕಾರ್ನರ್ ಗಳು
ಪರದೆ ಮಧ್ಯದಲ್ಲಿ ಸ್ಟಾರ್ಟ್ ಐಕಾನ್
ಬಹುಶಃ ವಿಂಡೋಸ್ ಬಂದಾಗಿನಿಂದ ಸ್ಟಾರ್ಟ್ ಐಕಾನ್ ಎಡ ಭಾಗದಲ್ಲಿತ್ತು. ಈಗ ಮೈಕ್ರೊಸಾಫ್ಟ್ ಮಧ್ಯ ಭಾಗಕ್ಕೆ ತಂದಿದೆ. ಅದರಲ್ಲೇನಿದೆ ವಿಶೇಷ ಎಂದು ಮ್ಯಾಕ್ ಬಳಕೆದಾರರು ಮೂಗು ಮುರಿಯಬಹುದು. ಯಾಕೆಂದರೆ ಮ್ಯಾಕ್ ನಲ್ಲಿ ಹಲವು ದಶಕಗಳಿಂದ ಹಾಗೆ ಇತ್ತು.
ಹೊಸ ಸ್ಟಾರ್ಟ್ ಮೆನು
ಸ್ಟಾರ್ಟ್ ಮೆನು ಕೂಡಾ ಬದಲಾಗಿದೆ. ಐಕಾನ್ ಗಳನ್ನು ಜಾಸ್ತಿ ಬಳಸುವ ಈ ಮೆನು ತುಂಬಾ ಒರ್ಗನೈಸ್ಡ್ ಅನ್ನಿಸುತ್ತೆ. ಇವೆಲ್ಲ ಸ್ವಲ್ಪ ಮುಂಚೆ ಮಾಡಿದ್ದರೆ ಒಳ್ಳೆಯದಿತ್ತು ಅನ್ನಿಸಿದರೂ ಆಶ್ಚರ್ಯ ಇಲ್ಲ.
ಹೊಸ ಸೆಟ್ಟಿಂಗ್ ವಿಭಾಗ
ಸೆಟ್ಟಿಂಗ್ ವಿಭಾಗ ಕೂಡಾ ಬದಲಾಗಿದ್ದು ಈಗ ಹೆಚ್ಚಿನ ಸೆಟ್ಟಿಂಗ್ ಇಲ್ಲೇ ಮಾಡಬಹುದು. ಕಂಟ್ರೋಲ್ ಪ್ಯಾನೆಲ್ ಗೆ ಹೋಗ ಬೇಕಾಗಿಲ್ಲ.
ನಿದಾನವಾಗಿ ಕಂಟ್ರೋಲ್ ಪ್ಯಾನೆಲ್ ನಲ್ಲಿ ಆಯ್ಕೆ ಕಡಿಮೆ ಮಾಡಲಾಗಿದೆ. ಬಹುಶಃ ಮುಂದಿನ ವರ್ಶನ್ ಅಲ್ಲಿ ಕಂಟ್ರೋಲ್ ಪ್ಯಾನೆಲ್ ಮಾಯವಾದ್ರೂ ಆಶ್ಚರ್ಯ ಇಲ್ಲ!
ಮಲ್ಟಿಪಲ್ ಡೆಸ್ಕ್ ಟಾಪ್ ಆಯ್ಕೆ
ಈ ಆಯ್ಕೆ ಕೂಡಾ ಲಿನಕ್ಸ್ ಹಾಗೂ ಮ್ಯಾಕ್ ಅಲ್ಲಿ ಹಲವು ದಶಕಗಳಿಂದ ಇತ್ತು. ಈಗ ವಿಂಡೋಸ್ ಗೆ ಬಂದಿದೆ. ಇದರ ಸಹಾಯದಿಂದ ನೀವು ಹಲವು ಡೆಸ್ಕ್ ಟಾಪ್ ಕ್ರಿಯೇಟ್ ಮಾಡಿ ಅದರ ನಡುವೆ ಯಾವಾಗ ಬೇಕಾದರೂ ಸ್ವಿಚ್ ಮಾಡಬಹುದು.
ವಿಜೆಟ್ ವಿಭಾಗ
ವಿಂಡೋಸ್ ನ ಫ್ಲಾಪ್ ವರ್ಶನ್ ಆದ ವಿಸ್ತಾದಲ್ಲಿ ಸಹ ವಿಜೆಟ್ ಡೆಸ್ಕ್ ಟಾಪ್ ಮೇಲೆ ಇತ್ತು. ಆದರೆ ಬ್ಯಾಟರಿ ಸಮಸ್ಯೆ, ಸ್ಲೋ ಹೀಗೆ ಹಲವು ಕಾರಣದಿಂದ ಜನಪ್ರಿಯ ಆಗಿರಲಿಲ್ಲ.
ಈಗ ಮತ್ತೆ ವಿಂಡೋಸ್ ೧೧ ರಲ್ಲಿ ವಿಜೆಟ್ ಐಕಾನ್ ಟಾಸ್ಕ್ ಬಾರ್ ಮೇಲೆ ಬಂದಿದ್ದು ಅಲ್ಲಿ ಹವಾಮಾನ, ಸುದ್ದಿ, ಶೇರುಗಳ ವಾಚ್ ಲಿಸ್ಟ್ ಮೊದಲಾದವು ಬಂದಿದೆ. ಇದನ್ನು ನೋಡಲು ನೀವು ಐಕಾನ್ ಕ್ಲಿಕ್ ಮಾಡಬೇಕು.
ಸುಧಾರಿತ ಸ್ಪ್ಲಿಟ್ ಸ್ಕ್ರೀನ್ ಆಯ್ಕೆ
ಪರದೆಯ ಮೇಲೆ ಒಂದಕ್ಕಿಂತ ಹೆಚ್ಚು ಎಪ್ ತೆಗೆಯುವ ಸೌಲಭ್ಯ ವಿಂಡೋಸ್ ೮ ರ ಜಮಾನಾದಲ್ಲೇ ಬಂದಿತ್ತು. ಆದರೆ ಯೂಸರ್ ಫ್ರೆಂಡ್ಲಿ ಆಗಿರಲಿಲ್ಲ.
ಈಗ ಪ್ರತಿ ವಿಂಡೋ ನ ರಿಸ್ಟೋರ್ ಐಕಾನ್ ಮೌಸ್ ಒವರ್ ಮಾಡಿದಾಗ ನಾಲ್ಕು ವಿಧದ ಲೇಔಟ್ ಅಲ್ಲಿ ಅಪ್ಲಿಕೇಶನ್ ಅನ್ನು ಮೂವ್ ಮಾಡುವ ಆಯ್ಕೆ ಇದೆ. ಇದು ಮೊದಲಿನ ಹಲವು ವಿಧಾನಕ್ಕಿಂತ ಬಳಕೆ ಸುಲಭ ಏನೋ ಅನ್ನಿಸುತ್ತೆ. ಜನ ಬಳಸುತ್ತಾರಾ? ಕಾದು ನೋಡ ಬೇಕು.
ಕ್ವಿಕ್ ಸೆಟ್ಟಿಂಗ್ ಗಳು
ಡೆಸ್ಕ್ ಟಾಪ್ ನಲ್ಲಿ ಟಾಸ್ಕ್ ಬಾರ್ ನ ಬಲ ಭಾಗದಲ್ಲಿ ಬ್ಯಾಟರಿ / ಸ್ಪೀಕರ್ / ವೈಫೈ ಐಕಾನ್ ಸೇರಿ ಕ್ವಿಕ್ ಸೆಟ್ಟಿಂಗ್ ಮೆನು ಓಪನ್ ಮಾಡುತ್ತವೆ. ಇಲ್ಲಿಂದ್ ಬ್ಯಾಟರಿ, ಬ್ಲೂ ಟೂತ್, ವೈ ಫೈ, ಎಕ್ಸೆಸ್ಸಿಬಿಲಿಟಿ ಸೆಟ್ಟಿಂಗ್ ಬದಲಾಯಿಸಬಹುದು.
ಸ್ಕ್ರೀನ್ ಬ್ರೈಟ್ನೆಸ್ಸ್ ಹಾಗೂ ವಾಲ್ಯೂಮ್ ಸಹ ಬದಲಾಯಿಸಬಹುದು.
ಥೀಮ್ ಬದಲಾವಣೆ
ವಿಂಡೋಸ್ ೧೧ ರಲ್ಲಿ ವಿಭಿನ್ನ ಥೀಮ್ ಲಭ್ಯವಿದೆ. ಎಲ್ಲವನ್ನೂ ನೀವೂ ಟ್ರೈ ಮಾಡಿ ನೋಡಿ.
ಹೊಸ ಸ್ಟೋರ್ ಎಪ್
ಹಳೆಯ ಎಲ್ಲ ವಿಂಡೋಸ್ ಅಲ್ಲಿ ೮ ಮತ್ತು ೧೦ ರಲ್ಲಿ ಅದರ ಸ್ಟೋರ್ ಎಪ್ ಇಷ್ಟ ಆಗಿರಲಿಲ್ಲ. ಒಂದು ಅಪ್ಲಿಕೇಶನ್ ಗಳ ಕೊರತೆ. ಅಪ್ಲಿಕೇಶನ್ ಇದ್ದರೂ ಅನೇಕ ಫೀಚರ್ ಅಂಡ್ರಾಯಿಡ್ / ಐಒಎಸ್ ಗೆ ಹೋಲಿಸಿದರೆ ಕಡಿಮೆ ಇರುವದು.
ವಿಂಡೋಸ್ ೧೧ ಸದ್ಯದಲ್ಲೇ ಅಮೇಜಾನ್ ಎಪ್ ಸ್ಟೋರ್ ಮುಖಾಂತರ ಅಂಡ್ರಾಯಿಡ್ ಎಪ್ ಗಳನ್ನು ಸಪೋರ್ಟ್ ಮಾಡಲಿದೆ. ಅಂದರೆ ನೀವು ಅಂಡ್ರಾಯಿಡ್ ಎಪ್ ಗಳನ್ನು ವಿಂಡೋಸ್ ೧೧ ರಲ್ಲಿ ಬಳಸಬಹುದು.
ಹೊಸ ಎಪ್ ಗಳು
ಕ್ಯಾಲ್ಕುಲೇಟರ್, ಪೇಂಟ್, ರೆಕಾರ್ಡರ್, ಕ್ಲಾಕ್, ಕ್ಯಾಲೆಂಡರ್, ಸಾಲೀಟೇರ್ ಎಲ್ಲಾ ಎಪ್ ಗಳು ಅಪ್ ಡೇಟ್ ಆಗಿವೆ. ಆದರೆ ಸಾಲಿಟೇರ್ ಗೇಮ್ ನನ್ನ ಪಿಸಿಯಲ್ಲಿ ಓಪನ್ ಆಗಲೇ ಇಲ್ಲ, ಕೇವಲ ಸ್ಟಾರ್ಟ್ ಸ್ಕ್ರೀನ್ ಅಲ್ಲಿ ಹ್ಯಾಂಗ್ ಆಯ್ತು.
ವಿಂಡೋಸ್ ೧೧ ಅಪ್ ಗ್ರೇಡ್ ಮಾಡುವದು ಹೇಗೆ?
ಇತ್ತೀಚೆಗೆ ನಾನು ನನ್ನ ಲ್ಯಾಪ್ ಟಾಪ್ ಅಲ್ಲಿ ವಿಂಡೋಸ್ ೧೦ ರಿಂದ ೧೧ ಕ್ಕೆ ಅಪ್ ಗ್ರೇಡ್ ಮಾಡಿದೆ. ಇದು ಉಚಿತ ಹಾಗೂ ತುಂಬಾ ಸರಳವಾದ ಪ್ರಾಸೆಸ್.
ಸ್ಟಾರ್ಟ್ ಮೆನು ಗೆ ಹೋಗಿ ಅಲ್ಲಿ ಸೆಟ್ಟಿಂಗ್ ಅಲ್ಲಿ ಅಪ್ ಡೇಟ್ ವಿಭಾಗದಲ್ಲಿ ಹೋದರೆ ನಿಮ್ಮ ಲ್ಯಾಪ್ ಟಾಪ್ ಅಥವಾ ಡೆಸ್ಕ್ ಟಾಪ್ ವಿಂಡೋಸ್ ೧೧ ರ ಜೊತೆ ಕಂಪಾಟಿಬಲ್ ಇದೆಯಾ ಇಲ್ಲವಾ ಅದನ್ನು ತಿಳಿಸುತ್ತದೆ. ಅಕಸ್ಮಾತ್ ಕಂಪಾಟಿಬಲ್ ಇದ್ದರೆ ಡೌನ್ ಲೋಡ್ ಲಿಂಕ್ ಲಭ್ಯವಿರುತ್ತದೆ.
೨೦೧೮ಕ್ಕಿಂತ ಹಳೆಯ ಹಾರ್ಡವೇರ್ ಜೊತೆ ಕಂಪಾಟಿಬಲ್ ಇರುವ ಸಾಧ್ಯತೆ ತುಂಬಾ ಕಡಿಮೆ.
ಕೊನೆಯ ಮಾತು
ಒಟ್ಟಿನಲ್ಲಿ ವಿಂಡೋಸ್ ೧೧ ವಿಂಡೋಸ್ ೧೦ ರ ಇಂಕ್ರಿಮೆಂಟಲ್ ಅಪ್ ಡೇಟ್ ಅನ್ನಬಹುದು. ವಿಂಡೋಸ್ ೧೦ರ ಎಲ್ಲ ಒಳ್ಳೆಯ ಗುಣ ಇಟ್ಟು ಕೊಂಡು ಅದರ ಮೇಲೆ ಇದನ್ನು ಡೆವೆಲಪ್ ಮಾಡಲಾಗಿದೆ ಹೇಳಬಹುದು.
ಇದಕ್ಕೂ ಕಾರಣವಿದೆ. ವಿಂಡೋಸ್ ಎಂಟರ್ ಪ್ರೈಸ್ ಗಳಲ್ಲಿ ಅತಿ ಜನಪ್ರಿಯ ಆಪರೇಟಿಂಗ್ ಸಿಸ್ಟೆಮ್. ಎಂಟರ್ ಪ್ರೈಸ್ ಗಳಿಗೆ ತೀರಾ ಬದಲಾವಣೆ ಇದ್ದರೆ ಅಪ್ ಗ್ರೇಡ್ ಮಾಡುವದು ಕಷ್ಟ. ಅದಕ್ಕಾಗಿ ಹಂತ ಹಂತವಾಗಿ ಬದಲಾವಣೆ ತರಲಾಗುತ್ತಿದೆ.
ಅಂಡ್ರಾಯಿಡ್ ಎಪ್ ಸಪೋರ್ಟ್ ಒಂದು ರೀತಿಯಲ್ಲಿ ಕ್ರಾಂತಿ ಕಾರಿ ಆಗಿದ್ದು ಎಪ್ ಗಳು ಜಾಸ್ತಿ ಇಲ್ಲದೇ ಸೊರಗಿರುವ ವಿಂಡೋಸ್ ಎಪ್ ಸ್ಟೋರ್ ಗೆ ಜೀವಾಮೃತ ಆಗಬಹುದು.
ಅಕಸ್ಮಾತ್ ಹೊಸ ವಿಂಡೋಸ್ ಲ್ಯಾಪ್ ಟಾಪ್ ಖರೀದಿಸುತ್ತಿದ್ದರೆ ವಿಂಡೋಸ್ ೧೧ ಕಂಪಾಟಿಬಲ್ ಅನ್ನುವದನ್ನು ಖಚಿತ ಪಡಿಕೊಂಡು ಖರೀದಿಸಿ. ಈಗಾಗಲೇ ವಿಂಡೋಸ್ ೧೦ ಲ್ಯಾಪ್ ಟಾಪ್ ಇದ್ದು ಅಪ್ ಗ್ರೇಡ್ ಮಾಡುವ ಮುನ್ನ ನೀವು ಬಳಸುವ ಎಲ್ಲ ಎಪ್ ಗಳು, ಸಾಫ್ಟವೇರ್ ಗಳು ಸಪೋರ್ಟ್ ಆಗುತ್ತಾ ಒಮ್ಮೆ ನೋಡಿ.
ಈ ಲೇಖನ ಹೇಗನಿಸಿತು? ಹೇಗೆ ಇನ್ನೂ ಇಂಪ್ರೂವ್ ಮಾಡಬಹುದು? ಕಮೆಂಟ್ ಹಾಕ್ತೀರಾ? ನಿಮ್ಮ ಗೆಳೆಯರಿಗೆ ಇದು ಇಷ್ಟ ಆಗುತ್ತೆ ಅನ್ನಿಸಿದರೆ ಅವರಿಗೂ ಶೇರ್ ಮಾಡಿ. ಸರಿನಾ? ವಂದನೆಗಳು.
ಬನ್ನಿ ಕಂಪ್ಯೂಟರ್, ಸ್ಮಾರ್ಟ್ ಫೋನ್ ಬಗ್ಗೆ ತಿಳಿಯೋಣ.